Крымскотатарский язык

930-НДЖИ СЕНЕЛЕРИ КЪЫРЫМТАТАР МАТБУАТЫ: МИЛЛИЙ ТИКЛЕНЮВ ВЕ СЫНФИЙ ЯНАШУВ

1930- сенелери къырымтатар матбуаты – миллий газетаджылыкънынъ] (журналистиканынъ) гъает меракълы ве айны заманда пек аз теткикъ этильген саасы сайыла.

Озь Ватанындан сюргюн этильген халкънынъ баягъы илерилеген матбуаты чокъ вакъыт девамында асыл да анъылмады. Ялынъыз 1990 – 2000 – нджи сенелери И.А.Керимов, Р.Музафаров ве Г.З.Юксельнинъ [23] бу саада япкъан эмеклери корюнип башланды. Муэллифлернинъ ишлеринде анъылгъан газета ве меджмуаларнынъ тасвири, мезкюр девирге аит оларнынъ мевзуаты, меселелери ве даимий муэллифлернинъ даиреси бериле. Амма, кечкен асырнынъ 30 – нджи сенелеринде къырымтатар матбуатынынъ умумий вазиети, сынфий янашув шараитинде миллий тикленювнинъ имкянсызлыгъыны косьтерген партия идаресине табийлик дереджеси шимдики замангъа къадар теткикъатчыларнынъ назарындан четте къалды. Косьтерильген бакъымларнынъ (аспектлернинъ) огренилюви ишбу макъаленинъ вазифесини тешкиль этти.

1920 – нджи сенелери къырымтатар тилинде деврий матбуатнынъ инкишаф деври олды. О вакъытта «Енъи дюнья», «Яш Къувет» адлы виляет газетасы, «Илери», «Енъи чолпан», «Козьайдын», «Окъув ишлери», «Кой кооператоры», «Асрий мусульманлыкъ» меджмуалары, онларнен ерли газета ве бюллетеньлер нешир олуна эди.

Бир сыра алимлернинъ фикрине коре, къырымтатар матбуатына айырылгъан дикъкъат партиянынъ «тамырлашув» (коренизация) сиясети ве Москванынъ, Къырым АССРны «буфер»деп айтылгъан джумхуриетке чевирмек истеги иле багълы эди. «Буфер» джумхуриети дегенде, Советлер улькесини мусульман Шаркъынен багълагъан озьгюн бир бугъум деп анълай эдилер.

Мусульман Шаркъыны (Тюркиени) исе Къырымнынъ мусбет мисалинде коммунистик гъаесинен меракъландырмакъ козьде тутула эди. 1921 – нджи сенеси Къырым виляети Октябрь комиссиясынынъ беяннамелерининъ биринде – «Къара денъизнинъ ялысындаки Къырым Совет Джумхуриети Шаркъ халкълары ичюн ёл косьтереджек фарос (маяк) олмакъ керек» - деп айтыла эди [1].

1921 сенеси «Къырымнынъ девлет меселесине даир» адлы беяннамеде четэль ишлери наркомы Селим Меметов «Биз мында (Къырымда – Н.Я.) Советлернинъ ойле бир орьнекли кошечигини яратмалымыз (мейдангъа кетирмелимиз) ки, бутюн Шаркъ тешвикъаты ичюн хызмет этсин, Шаркъны ёнельтимини (ориентациясыны) озюне джельп этсин ве кереги киби тесирге малик олсун» - деп язгъан эди.

Бойле этип, Къырым АССРнинъ темели къоюлгъанынен миллий тикленюв гъаеси онъа зыт кельген фикирнен, яни къырымтатарларны коммунизмнинъ мусульман мемлекетлерине даркъалмасы ичюн файдаланмакъ керек деген гъаесине къаршы чыкъты.

Миллий гъаенинъ башлыджа махкум олгъаныны (обречённость) Ленин ве дигер большевиклернинъ миллий меселе боюнджа язылгъан ишлери исбатлайлар. Бу ишлерде бейнельминеллик (интернационализм) – шубесиз энъ устюн гъае эди. Амма кене де янъы акимиетнинъ «тамырлашув» (коренизация) планы мусавий бейнельминеллик ве истинаф этильмез сынфий янашма эснасларыны бир къач йылгъа йымшатмакъ насип олды.

Лякин энди 1927 сенесининъ кузюнден акс эснас башланды: ресмий къырымтатарлашув ёнелешинен бир заманда «къырымтатар буржуа миллетчилиги» ве «миллий - мейиллештирюв» (национал уклонизм) иле куреш ачылды. 1927 сенесининъ кузюнде ОГПУ тарафындан Къырымда «Миллий Фиркъа» «Контрреволюцион тешкиляты»на даир 64513 санлы тахкъикъат иши башланды, 1928 – нджи сенесининъ январь айында Къырым ЦИКнинъ реиси, Къырымнынъ итибарлы адамы ве сиясетчиси Вели Ибраимов тевкъиф олунды. Тарихчы В.Возгриннинъ фикрине коре, Вели Ибраимовнынъ къырымтатар миллий рухунда тербие корьгени, ленинизм ве большевизмге къаршы чыкъмакъ – деп сайылмасы ичюн етерли эди. Вели Ибраимовнынъ атылмасынен, къырымтатар зиялыларына къаршы кутьлевий террор башланды.

В.М. Брошеван къайд эткенине коре (21, 50), умумен «Миллий Фиркъа» иши боюнджа 63 адам тевкъиф олунды . Олардан 12 адам: Х.Чапчакъчы, С.Хаттатов, Б.Одабаш ве дигерлери – къуршунгъа тизильди. Амма базыларына (А.Озенбашлы ве дигерлерине) къуршун джезасы 10 йылгъа лагерьде къапатылув джезасына денъиштирильген эди. Махбюслернинъ аман – аман эписи Соловкиге сюргюн этилип, анда да чешит йылларда вефат эттилер.

1920 – нджи сенелернинъ сонъу ве 1930 – нджи сенелер миллий зиялыларнынъ бирлешмесине хызмет эткен, къырымтатар тили ве эдебиятынынъ инкишафынен, озь халкъынынъ тарихы ве этнографиясыны огренювинен огърашкъан къырымтатар неширлерининъ ёкъ этюв деври олды. Бу вакъытта динге къаршы арекетлер далгъасында «Асрий мусульманлыкъ» меджмуасы къапатылды. Мусульманлар диний идаресининъ нешир органы (нешир алети, вастасы) олгъан бу меджмуа 1926 сенеси эр ай 2000 (2 бинъ) нусхада чыкъа эди. 1926 сенеси орта мектеплерде маариф ве тасиль меселелерини айдынлатмакъ макъсадынен дердж олунгъан «Окъув ишлери» дергисининъ нешир олунувы токътатылды ве ёкъ этильди.1930 сенеси эдебий ве бедий бильги берген, гъает гузель ресимлернен сюслендирильген меджмуадан пионер органына чевирильген «Козьайдын» дергиси де къапатылды.

1930 – нджи сенелери янъы къырымтатар неширлери мейдангъа кетирильди. Амма олар миллий тикленюв сиясетини къаталакъланмасыны (свёртывание) анълатув ерине коллективизация, сиясий эснаслар, медениет ве маариф муэссиселеринден «темизлев» киби арекетлерни ачыкълай эдилер. «Шекиль боюнджа миллий, мундериджесине коре – «фиркъавий» (партиявий) олгъан, медениет акъкъында мешур совет мюддеасы (тезисы) ойле этип муджесем этильди (джанландырылды).Мисаль оларакъ «Ленин - Ёлу» адлы Алушта район газетасы 1933 сененинъ январь – февраль айларынынъ 9(докъуз) – нджы санында тютюн азырлавы (топлавы) акъкъында 19(он докъуз) макъале бастырды. Лякин тютюн азырлавына газета саифелеринде косьтерильген бойле дикъкъатны да обком рехберлери, заман талабына джевап бермей деп айттылар.

Къырым Обкомы газетанынъ даа бир эксиклиги оларакъ, парник ходжалыгъы, тарла сюрюви, юзюм асравджылыгъы ве багъчаджылыкъкъа багъышлангъан махсус рубрикаларнынъ олмагъаныны да къайд этти. Фыркъа ёлбашчылыгъы газетада ишлев ве малие планыны тизмек ичюн, социалистик айван асравджылыгъы ве атчылыкъ акъкъында малюматларнынъ олмагъаныны ве башкъа малюматларнынъ «алчакъ фыркъавий (партиявий) севиеси» олгъаныны мемнюниетсизликнен бильдирди [15].

Бу киби этник матбуатнынъ хусусиетлеринден узакъ олгъан талаплар Къырым ОК – нынъ инструкторы Б.Семёнов тарафындан дигер къырымтатар нахие (район) газеталары – «Ударник» (Ялта), «Большевик» (Багъчасарай), «Коммунист» (Къарасувбазар), «Ударный труд» (Буюк - Онлар) киби газеталарына да къоюлды. Обкомнынъ 1933 с. нахие матбуатынынъ якъын обзорындан келип чыкъкъан вазифелер, «инсанларнынъ гонъюллерини джоштырмакъ ичюн, газеталар энъ эвеля колхоз тарафындан отьмек ве тютюн тиджарети, амбарларгъа богъдай толдурувы, техниклештирюлюв, махсус келир кетирген осюмликлернен чалышув эснасы, (айырыджа тютюнджиликнен) атны азырлав, урлукъ топлав, ходжалыкъ левазимини (сельхозинвентарь) тамирлев, колхозларнынъ йыл эсабатыны тизюв, сынфий душманлар – кулакларнен куреш, колхоз малыны хырсызланувы ве онъа зарар кетирювнен куреш, колхозджы – илери ишчилернинъ (ударниклернинъ) Бутюниттифакъ къурултайынынъ фаалиети (компаниясы) киби эсас-ходжалыкъ-сиясий вакъиаларны айдынлатмакъ кереклигини косьтерди.[10].

Мезкюр меселенинъ ачыкъланувы бир тертипте берильмек керек эди.Янъылыкъ хаберлерини берювде «къуру хроникалликтен» ред этип, газеталар,олып кечкен вакъиаларнынъ мефкуфевий хасыны ( подоплека) косьтермек керек эдилер.Макъалелер «фыркъасызлыкъ тилинен » (беспартийным языком) язылгъаны да, газета муарририети къабаатлана эди [11]. Козьден кечирильмеде (обзорда) косьтерильген етишмемезликлер «ОК ВКП(б)тарафындан «фыркъанынъ» зайыф япылгъан рехберлигини анълата эди [16].Бойле рехберлик къуветлендирильгенине шубе ёкъ эди.

Виляет газеталарына даа да къатты талаплар къоюла эди.Меселя, «Яш къувет» газетасынынъ етишмемезликлери деп: - фыркъа къуруджылыгъы болюгининъ олмагъаны, фыркъа къарарларынынъ кечиктирилип нешир этилюви (эм де биринджи саифеде дегиль де, та 2-4 саифелерде) отьмек азырлавы ве берекет топлавынынъ кечирильмеси акъкъындаки малюматлар невбетнен берильгени, сиясий макъалелернинъ олмагъаны киби ве иляхре къусурлар танылгъан эди [1]. Айны бойле бир къусурлар «Енъи Дюнья» газетасында да тапылды. – Хусусан, шу «Виляет газетасы ичюн» асла да ёл къоюлмайджакъ делиль, бу газетанынъ 1933 сенесининъ 1 августындан башлап, та 10 – нджы августкъадже олгъан девирде чыкъкъан санларында 15 июньде чыкъкъан МКнинъ ерли болюклери (ячейкалары)акъкъындаки Къарарларынынъ омюрге тадбикъ этильмеси акъкъында ич те бир шейлер айтылмагъан [14].

Къырымтатар неширлери ичюн «темизлев»(чистка) деври де дешетли олды.Бу девирде этник газета ве дергилер миллий зиялыларны бири – бирине къаршы къоймакъ ичюн васита сыфатында къулланыла эдилер.Меселя, «Енъи Дюнья» [20] ОК ВКП(б) пленумындаки Б.А.Семёновнынъ нуткъыны нешир этти.Онынъ нуткъында хусусан Амет Рашиднинъ, Осман Акъчокъракълынынъ, Багъчиван Рашиднинъ, Аблемит Аблаев ве дигерлернинъ «миллетчилик маиети» шимдики вакъыткъа къадар даа пек аз ве енгильден мейдангъа чыкъарылгъан ве ачыкълангъан. Бу чыкъыштан сонъ матбуатта ве Пединститутнынъ ве Крымгосиздатнынъ темизлев комиссияларында «миллетчилернинъ» «сафдашлары» тарафындан «мейдангъа чыкарылмакъ»лар девам этильди, «Енъи Дюнья» газетасына къабаатлангъанларнынъ озь-озьлерине тенкъит сыфатында язгъан мектюплери келип башлады ве иляхре.

Газеталар да, оларнынъ баш муаррирлери киби бутюнлей коммунизм ишине садыкъ олмалары керек эдилер.

Мисаль оларакъ, 1930 сенесиндеки Виляет газеталары муаррирлерининъ джедвели бойле такъдим этиле эди [7]:

Сойады, адыБеджерген вазифесиФыркъа стажыГазетанынъ адыКъайсы фыркъанынъ органы
1. Тархан Ильяс Омерович Месуль муаррир1919«Енъи Дюнья» (Новый мир)ОК ВКП(б) Кр. ЦИК КС ПС Акъмесджит шеэр шурасы
2. Дерменджи ОмерМуаррирНамзет 1927«Яш Къувет» (Новая сила)ОК ВЛКСМ
3. Джамалединов КеримМуааррир1926«Ильк – адым» (первый шаг)Кр.Политпросвет ОД ОДН НТА

Бу этник неширлернинъ (догърусыны айткъанда, миллий тильде чыкъкъан неширлернинъ) сынфий – бейнельминель системасы 1930 сенелери СССРде итираз (къаршылыкъ) догъурмады, лякин Гъарпта о гъадаплы мухалефени (оппозицияны) мейдангъа кетирди.

Колумбия универсиетининъ миллий меселе боюнджа мутехассысы А.Д. Лоу «The Russian Reviero» меджмуасында бойле язды: «Эгер бутюн миллий медениетлер «мундериджесине коре, социалистик» олсалар ве оларгъа бейнельминеллик тарзында язылгъан ишлер тесир этсе, бунда «медениет чешитлигини» эсасен оларакъ,тек тиль чешитлиги деп анъламакъ мумкюн, амма базы миллий медениетлер хазинелери исе акъикъатен «социализм» ве «бейнельминеллик» денъизинде богъулып къалалар [25].

Э.Гудман да А.Д.Лоунен разы олып, бу система миллий хусусиетлерни илеридеки инкишафкъа сынъырлар къоювына къарарлаштырылып, эр бир медениетнинъ мефкуревий мундериджесини стандартизация ёлунен еткизмек мумкюн деп тасдикълады[26].

Бунъа бакъмайып, къырымтатар тилинде чыкъкъан неширлернинъ бир чокъ сайыда мевджут олгъаны, оларнынъ миллий тикленюв гъаесине чалышмакъны девам эттирдилер.Бу эснасны не къырымтатар эрбапларына къаршы япылгъан репресиялар, не де къырымтатар тилининъ къайсы шивеси (чёль, орта ёлакъ, ялы бой) эсас этип алынаджагъы акъкъында сиясетлештирильген мунакъашалар токътатып оламадылар.

Юкъарыда анъылгъан Эллиот Гудманн – тек тиль, медениетнинъ миллий хусусиетлернинъ энъ муим шекили деп сая эди.Та XIX асырда Вильгельм Губольдт миллий тильнинъ миллий анълайышнен, миллий идракнен, миллетнинъ табиаты, хасиетинен багъы олгъаны косьтерген эди.

«Тильде биз эр вакъыт тильге хас олгъан топлукъны ве тильнен, миллет табиатындан алынгъан хасиетлерни коремиз», ве девамы оларакъ: «Тильнинъ тесири эр тарафлама устюнликнен – тиль дуйгъусынынъ юкселиши ве дюньябакъышынынъ озюне хас шекилленювинен ифаделене» - деп язгъан эди.В.Гумбольдт [19]. Миллий тильнинъ миллий фикир этювнен озьара багъы олгъаны акъкъында А.А.Потебня да айткъан эди.Онынъ фикири боюнджа, «биревнинъ, я да ябанджынынъ тилини бильмек, бизге онынъ къальбининъ «гизли магъазыны» ве кичик букюльмелерини (изгибы) ача, [22] ойле экен, халкъ озь къальбининъ «гизли магъазларыны» да терджимеде дегиль де, тек озь ана тилинде бутюнлей ача биле.Бойледже, бугуньде – бугунь миллий (этник) матбуат – бу тильде материалларны бастырувнен. миллий тильнинъ инкишафына ярдымджы ола – деген мюддеаны (тезисны) асыл да исбат этип отурмакъ керекмей (башындан анълашайыкъ, матбаада миллетлерара тиллернинъ нисбети – бу башкъа, айыры бир теткъикъат мевзусыдыр).

Эгер шимди къырымтатр окъуйыджылары ичюн ана тилинде тек эки газета – «Янъы Дюнья» ве «Къырым» нешир этильсе, амма 1930 – нджи сенелери аман – аман эписи неширлери къырымтатар тилинде басыла эди: юкъарыда анъылгъан «Енъи Дюнья» ве «Яш Къувет» газеталары «пролетар медениети»(1930), «Большевик ёлы» (1930 – 1935 сс., ама 1936 – 1939 сенелери «Эдебият ве культура», 1939 – 1941 сенелери исе «Совет эдебияты», «Яш Ленинджилер» (1930 - 1941), «Совет къадынлыгъы» (1932 – 1941сс., 1932 – 1936 сенелери – «Къадынлыкъ социализм ёлунда», «Коммунист тербиеси»(1932 – 1933 сс.), къырымтатар тилинде нешир этильген нахие газеталар.

Онларнен миллий газета ве журналларда къырымтатар тили ойле де шиддетли инкишаф этти ки, сюргюнликни тильге ве бутюн къырымтатар медениетине косьтерген виран этиджи тесиринден сонъ, газета ве журналларда басылгъан эсерлер ве макъалелерни махсус лугъатсыз ве глосарийсиз окъумагъа чареси олмай эди.Чокъ теэссюф ки, къырымтатар неширлерининъ тиль джеэтинден шимдики усулы (системасы), дженктен эвелькисинден пек артта къала.

Къырымтатар неширлернинъ чокъусы девлет тарафындан малиевий ярдым (дотация) ала эдилер. Айрылгъан параларнынъ тасдыкълайыджы ракъамларына коре, девлет къырымтатар матбаасынынъ инкишафына ич те пара аджымай эди: 1930 сенеси къырымтатар неширлери кечиндирмесине (айлыкъ, мааш) девлет тарафындан 43,7 % микъдарда малиевни ярдым (дотация) алдылар[5].

Эр даим Обком тарафындан бу неширлернинъ тиражлары незарет этиле эди: матбуат эсабатларында оларнынъ тиражларынынъ эксилювине ёл къоюлмай эди.Онынъ ичюн 1926 сенеси Обком кятибетининъ матбуат боюнджа чыкъкъан къарарында, къырымтатар газеталарынынъ тиражлары аман – аман бутюнлей абунеджилернинъ сайысынен догъру келе деп къайд этильген эди («Енъи Дюнья» ичюн бу энъ чокъу 2290 нусха ве энъ азы 1610 нусха , «Яш Къувет» ичюн бу энъ чокъу 2213 нусха, ве энъ азы 1177 нусха). Къырымтатар газеталарынынъ (неширлерининъ) келеджекте оладжакъ инкишафы уйгъун деп танылды, мадам ки Къырым статистика башкъармасынынъ берген малюматларына коре даа 1922 сенеси Къырымда окъумагъа – язмагъа бильгенлернинъсайысы 53925 адам эди (энди 1926 сенесинедже бу шубесиз даа да юксельмели эди).

Бу эки газета боюнджа абунеджилернинъ сайысы – энъ чокъу (4500 адам) олып, окъумагъа – язмагъа бильгенлернинъ (саватлыларнынъ) 10,4 % файызыны тешкиль этти. Бойлеликле, обком «окъуйыджы кадрлары даа тюкенгени (биткени) ёкъ»– деп нетиджеге (къараргъа) кельди [3].1930 сенеси Обком кятибети къырымтатар неширлерининъ тиражлары рус тили ве меркезий неширлерге нисбетен эксилювине бинаэн къайгъырувгъа тюше ве къырымтатар матбуатынынъ абуне севиесини котермек ичюн малиевий ярдым теклиф эте [4].Къырым обкомынынъ малюматлар болюгининъ эдебиятнынъ миллий тиллерде нешир этилюви акъкъында берген тезкересине бинаэн, 1930 сенеси Къырымда 6 къырымтатар газета ве журналлары нешир этиле эди [6].

Неширлернинъ адыАфтада къач кере чыкъкъаныТиражы
«Енъи Дюнья» газетасы

«Яш Къувет» газетасы

«Илери» меджмуасы

«Козь - Айдын» меджмуасы

«Пролетар Медениети» меджмуасы

«Ильк Адым» газетасы

Эр кунь

Эр кунь

Айда 2 кере

Айда 2 кере

Айда 2 кере

Айда 2 кере

2500 нусха

2000 нусха

1500 нусха

1500 нусха

1000 нусха

1000 нусха

Амма бу нешир этильген газета ве меджмуаларнынъ тиражлары Обкомгъа етерли олып корюнмегени себебинден, ве МКнинъ невбеттеки – ерли газета ве журналларнынъ (неширлериниъ) тиражларыны арттырылмасы мунасебети иле 1930 сенесининъ 1 октябринден Къырымда нешир этильген ерли неширлернинъ тиражларыны чокълаштырмакъ къарарына келинди[9]:

«Къызыл Къырым» - 25000 нусхагъадже

«Енъи Дюнья» - 10000 нусхагъадже

«Яш Къувет» - 5000 нусхагъадже

«Ильк Адым» - 10000 нусхагъадже

Ойле этип, дёрт йылда «Енъи Дюнья»нынъ тиражы саде эсапкъа коре, 4,37 кере, «Яш Къувет»нинъ тиражы исе 2,26 кере артты.Бунынъле, юкъарыда анъылгъан 1930 – нджи сенелеринде къырымтатар неширлери бир сыра меселелерден къуртулып оламадылар, олардан энъ муими – къырымтатар неширлерининъ, рус неширлерине нисбетен ихтисасий (профессиональный) мутехассысларнен (кадрларнен) темин олунмагъаны ве оларнынъ сайы тарафындан азлыгъы да къайд этильди.Рус газеталарындан фаркълы оларакъ, къырымтатар газеталарынынъ ве меджмуаларнынъ муарририетлери озь хадимлерининъ теркибине (сырасына) мытлакъа терджиманларны къошмакъ керек эдилер, мисаль оларакъ, «Енъи Дюнья» газетасында басылгъан малюматларнынъ 50 % терджиме этильген ола эдилер [8].Бойледже, къырымтатар газета ве журналларында (неширлеринде) чыкъкъан хадимлернинъ сайысы, рус газета ве журналларында (неширлеринде) чалышкъан хадимлернинъ сайысына нисбетен арткъач (чокъ) олмакъ керек эди, амма аслында (фактически) эр шей акисине олып кече эди: 1930 сенеси «Красный Крым» газетасынынъ хадимлери теркибинде (штатында) 53 адам чалыша эди, «Енъи Дюнья» газетасынынъ хадимлер теркиби (штаты) 12 (адамдан) мутехассыстан ибарет эди, шу заманда 12 адамдан – 3 (учю) Пединститутнынъ студентлери эдилер [8].

«Красный Крым» газетасынынъ бир йыллыкъ мааш фонду 60000 кумюш олгъан олса, «Енъи Дюнья»нынъ йыллыкъ мааш фонду исе тек 12000 кумюш эди. «Енъи Дюнья» ве «Яш Къувет» газеталарында басылгъан малюматларнынъ (материалларнынъ) буюк къысмы арекетчен, эйеджанлы ве шефкъатнен чалышкъан, миллий газеталарда ишбирлик япкъан, къырымтатар халкъына ичтимаий фаалиет косьтерген адамларгъа менсюп эди.

Ихтисаслы мутехассысларнынъ олмагъаны себебинден, рус тилинден къырымтатар тилине терджимелер этильгенде, бир сыра меселелер(хатасыз, догъру, айны терджимелер япмакъ) чыкъа эди.Бу меселенинъ муреккеплешкенининъ себеплеринден бири, юкъарыда, анъылгъан тиллернинъ чешит группаларгъа менсюп олгъанындадыр.Бутюн онйыллыкъ девамында къырымтатар неширлери айыры – айыры къарарлар ве нутукъларнынъ догъру терджиме этильмегени ичюн, тазирлендилер (иттихам этильдилер).«Яш Къувет» газетасында басылгъан такъризлерден (обзорлардан) биринде айырыджа, 1 июль 1933 сенеси виляет ВКП(б) Къарарынынъ биринджи маддеси ойле де бозулгъан ки, оны бир даа энди рус тилине терджиме этмеге мумкюн олмагъаны косьтериле.

Къырымтатар тилине терджимелер этильгенде, тек стилистик (услюп) ве грамматик ве манаджа хаталар (янълышлыкълар)устюнде дегиль де, атта ки арап сёзлерини къулланувгъа къаршы да куреш алып барылды.Бойле этип, мисаль оларакъ, рус тилинден алынгъан «сатира», «сатирические» сёзлерини арап «гужв», «гужвий»киби сёзлернен терджиме эткенлер («сатира», «клетка», «эпоха», «фаза» киби сёзлерни терджимесиз къалдырылмасы теклиф олунгъан эди), «полнота» сёзю мумкюн олгъан «тамлыкъ» ерине «меджмуа»арап сёзюнен терджиме этильгени мемнюниетсизликнен бильдириле. «Уничтожение», «ликвидация», «отмена», «упразднение»киби сёзлер, «гъайып этмек» киби сёзнен терджиме этилип, яни бу «джаймакъ» манасыны бильдиргени «марксизмнинъ баягъылаштырмакъ (опошлить), оппортунизмлик, кескин къайралгъан марксистик силясыны кёрла(т)макъ» – деп танылды[18] ве иляхре.

Газетанынъ матбааджылыкъ темели де зайыфлыгъынджа къалды.Эр даим ихтисаслы къырымтатар ишчилерининъ етишмегени дуюла эди.Латин элифбесине кечкен сонъ, матбаа арифлери ве матрицалар ёкълугъы да бир меселе олып къалды. «Енъи Дюнья» газетасы муарриетининъ хадими Джемиль Сейдамет озь газетасы акъкъында – «газетанынъ серлева ве маншетыны (шапка) джыйгъан ишчилер кимерде бир айыры бир арифни тапмакъ ичюн саатлернен мурретип кассасындан къыдыра эдилер»[8].

Къырымтатар неширлерининъ рус неширлерине нисбетен озюне хас меселеси оларакъ, оларнынъ колем (объём) тарафтан кичиклигидир.Эгер 1930 сенеси «Красный Крым» газетасынынъ 171100 матбаа арифине 2772 см2 колеми олгъан олса, «Енъи Дюнья» газетасы – 64000 матбаа арифине 1258 см2 колеми бар эди [8].

Бу демек ки, «Енъи Дюнья» газетасына 2,5 кере аз матбаа хаберлери сыгъа эди, о къадар кере де газетанынъ хаберлер алмакъ севиеси тюше эди (газета базы бир малюматларны четке алып къойып, 2 –3 кунь кечиктирип басмагъа меджбур эди).

Кедерли ве къайгъылы 1938 сенеси Къырымнынъ этник матбаасы ичюн дарма – дагъын заманы олды: шу куньгедже энди къырымтатар медениетининъ чокъусы эдиплери – языджылар, шаирлер, публицистлер, бир сыра неширлернинъ тешкиль этиджи адамлары ве фааллери репрессиягъа этильдилер (огъратылдылар).Къырымтатар тилининъ, тюркий тиллернинъ толусынен акс этмеген – зораки кирил элифбесине кечирилюви де къырымтатар неширлерине менфий тесир косьтере.

Реформа къырымтатар неширлерининъ адларына да тесир этти: «Енъи Дюнья» рус тилинде чыкъкъан виляет газетасынынъ адыны алып «Къызыл Къырым» олды, «Яш Къувет»газетасы исе – «Комсомол» адыны алды.

Ойле этип, кечкен асырнынъ отузынджы сенелериндеки СССРнинъ ички сиясети къырымтатар неширлерине бир севиеде тесир этмеди.Бир тарафтан ерли халкънынъ чокъ тиражлы этник неширлери системасыны къоллап – къуветлендирильгени корюльсе, бу халкънынъ тиль инкишафына ве къысмен миллий рухий медениетнинъ инкишафына хызмет этти.Шу йылларда(яни 10 йыл девамында) фыркъа рехберлиги тарафындан системни бир шекильде къырымтатар матбуатынынъ миллий руху ве диний аньанелери ёкъ этилип «сынфий» миллетлерара(бейнельминеллик) зенгинликлерине ер ачылды.

Терджиме эткен КъМПУнинъ къырымтатар ве тюрк эдебияты кафедрасынынъ оджасы К.У.Салядинов.

ЭДЕБИЯТ

1. Государственный архив Автономной Республики Крым (ГААРК).-Ф.1. – Оп. 1. – Д. 101-в. -Л. 5.

2. Государственный архив Автономной Республики Крым (ГААРК).-Ф.1. – Оп. 1. – Д. 101-в. - Л. 64.

3. Государственный архив Автономной Республики Крым (ГААРК).-Ф.1. – Оп. 1. – Д. 571. - Л. 89.

4. Государственный архив Автономной Республики Крым (ГААРК).-Ф.1. – Оп. 1. – Д. 960-а.- Л. 64-65.

5. Государственный архив Автономной Республики Крым (ГААРК).-Ф.1. – Оп. 1. – Д. 962-а. -Л. 116.

6. Государственный архив Автономной Республики Крым (ГААРК).-Ф.1. – Оп. 1. – Д. 1032.-Л. 23.

7. Государственный архив Автономной Республики Крым (ГААРК).-Ф.1. – Оп. 1. – Д. 1045.-Л. 33.

8. Государственный архив Автономной Республики Крым (ГААРК).-Ф.1. – Оп. 1. – Д. 1045.-Л. 59.

9. Государственный архив Автономной Республики Крым (ГААРК).-Ф.1. – Оп. 1. – Д. 1045.-Л. 77.

10. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 4-5.

11. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 6.

12. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 28-34.

13. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 29.

14. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 38.

15. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 48.

16. Государственный архив Автономной Республики Крым (ГААРК).-Ф.1. – Оп. 1.– Д. 1288.-Л. 73.

17. Государственный архив Автономной Республики Крым (ГААРК).-Ф.1. – Оп. 1.– Д. 1369.-Л. 75,76.

18. Государственный архив Автономной Республики Крым (ГААРК).-Ф.1. – Оп. 1.– Д. 1369.-Л. 68.

19. Гумбольдт В. фон. Язык и философия культуры. – М.: Прогресс, 1985. – С. 373, 375-376.

20. Ени дунья. – 1934.- № 119. – 24 мая.

21. Крымские репатрианты: депортация, возвращение и обустройство.- Симферополь: Амена, 1998. – 340 с.

22. Потебня А.А. Полн. Собр. Трудов: Мысль и язык. – М.: Лабиринт, 1999. – С. 203.

23. См.: Керим И.А.-оглу Медений эснас : 1920 – 1938.Къырымтатар тили, эдебияты ве медениетинден малюмат дестеги. – Сф. : Таврия, 1997. – 495 с.; Керимов И.А. Крымскотатарская периодическая печать довоенного времени // Ученые записки КГИПУ. – 2004.- № 5. – С. 125-133; Крымскотатарская энциклопедия / Автор-составитель проф.Р.Музафаров. – Симферополь: Ватан, 1993. – В 2 т.; Юксель Г.З. Периодизация крымскотатарской журналистики 1905-1941 гг. // Кулитура народов Причерноморья.- № 43. – 2003. // www.ccssu.crimea.ua/tnu/magazine/culture43/index.htm; Юксель Г.З. Развитие информационных жанров в крымскотатарской журналистике 1917-1928 годов (на примере изданий «Голос татар», «Мллет», «Крым», «Енъи Дунья») // Ученые записки КГИПУ. – 2004.- № 5. – С. 149-155.

24. Goodman E.R. The Soviet Design for a World State. – N.Y., 1960.

25. The Russian Review/- Hanover, 1963. – Vol. 22.- № 1-4. Автор: Яблоновская Наталья

Источник: Turkolog.narod.ru








Скачать учебные материалы по крымско-татарскому языку:

  • Руководство для обучения крымско-татарскому языку
  • Крымскотатарские словари